En abril con Andrea Nunes Brións

Neste mes de abril presentamos a unha poetisa moi nova e que aparece no panorama literario recentemente, no ano 2007. Andrea Nunes Brións ten poucas obras publicadas pero iso non lle resta forza á súa poesía impresa e dixital

A ecoloxía, o feminismo, a crítica contra o capitalismo son algúns dos temas que trata nos seus poemas. No ano 2011 publica o seu poemario Todas as mulleres que fun no que introduce a temática erótica.

Poemas visuais:      Todas as mulleres que fun    e    Agora ti

De que cor é a vida?

É vermella porque é unha cor que simboliza a vida e a morte. O vermello do sangue, do amor. As meixelas vermellas dunha nena cando ruboriza ou cando ten zapatos novos. Tamén é a cor da fin da vida. A morte é vermella. Algo vermello sempre che chama a atención.

Fragmento dunha entrevista realizada á poetisa en Galicia Hoxe:

http://www.galiciahoxe.com/index_2.php?idMenu=88&idNoticia=238957&idEdicion=719

De Todas as mulleres que fun:

Pensar que estiven perdida tanto tempo,

espallándome vertixinosa polas rúas todas

con salas de espera interminables,

tatuándome nos xeonllos os bares por onde ti estabas,

afiliada a todo aquilo que rexía o teu dogma.

Leonciña, ti que tantas bandeiras reciclaches

que tanta esperanza puñas no país,

todos os días primavera.